નર્મદા જીલ્લાના ૯૫૨ આંગણવાડી કેન્દ્રો પરથી ૦ થી ૬ વર્ષના બાળકો,સગર્ભામાતા,ધાત્રીમાતા અને કિશોરીઓના આધાર કાર્ડ નોંધણીની કામગીરીનો પ્રારંભ.

Published on BNI NEWS 2020-09-16 18:37:54

    • 16-09-2020
    • 290 Views

    (પ્રતિનિધિ : જ્યોતિ જગતાપ,રાજપીપળા)
    પોષણમાહની થનારી વચ્યુઅલ ઉજવણી દરમિયાન અંદાજે ૨૦૦ જેટલી જોખમી ચિન્હો ધરાવતી સગર્ભા માતાઓ સાથે તબીબી અધિકારીઓ દ્રારા કરાશે ટેલીફોનિક વાર્તાલાપ. 
    સહી પોષણ દેશ રોશન સુત્રને સાર્થક કરવા જન આંદોલન સ્વરૂપે વિવિધ પ્રવૃત્તિઓ સાથે કટિબધ્ધ નર્મદા જિલ્લો.
    રાજ્ય સરકારની વિવિધ યોજનાઓના લાભો આઈસીડીએસના લાભાર્થીઓને મળી રહે એવા ઉમદા આશયથી જિલ્લા  વિકાસ અધિકારી ડૉ. જીન્સી વિલીયમના માર્ગદર્શન અને જિલ્લા આઇસીડીએસ વિભાગના પ્રોગ્રામ ઓફીસર સુ કિષ્નાકુમારી પટેલની રાહબરી હેઠળ જિલ્લા પંચાયતના તાબા હેઠળની તમામ આઈસીડીએસ કચેરીઓમાં આધાર નોંધણી કીટ મહિલા અને બાળ વિકાસ વિભાગ દ્વારા ફાળવી આપવામાં આવેલ છે, જે અંતર્ગત પોષણ માસ-૨૦૨૦ની ઉજવણી ઝુંબેશના સ્વરૂપે કરી શકાય તે માટે તા. ૧૪ મી સપ્ટેમ્બર થી આઈસીડીએસના ૦ થી ૬  વર્ષના બાળકો, સગર્ભામાતા, ધાત્રીમાતા અને કિશોરી લાભાર્થીઓના આધાર કાર્ડ નોંધણીની કામગીરીનો પ્રારંભ કરાયો છે. આ કામગીરી તા.૨૫ મી સપ્ટેમ્બર, ૨૦૨૦ સુધી ચાલુ રહેશે.
    તદ્દઉપરાંત તા.૨૬ મી સપ્ટેમ્બર,૨૦૨૦ થી બપોરે ૩:૦૦ કલાક પહેલા આઇસીડીએસના લાભાર્થીઓની આધાર નોંધણીની કામગીરી તથા બપોરે ૩:૦૦ કલાક પછી અન્ય રહીશો/લાભાર્થીઓની આધાર નોંધણીની કામગીરી રાબેતા મુજબ હાથ ધરવામાં આવનાર છે.
    જિલ્લા આઇસીડીએસ વિભાગના પ્રોગ્રામ ઓફીસર સુ કિષ્નાકુમારી પટેલે જણાવ્યું હતું કે,પૌષ્ટિક અને સમતોલ આહાર,શરીરને આપે તંદુરસ્તી અપાર, સહી પોષણ દેશ રોશન સુત્રને સાર્થક કરવા નર્મદા જિલ્લામાં પોષણ સંદર્ભે લોકજાગૃત્તિ લાવવા જન આંદોલન સ્વરૂપે વિભિન્ન પ્રવૃત્તિઓ કરી પોષણમાહ-૨૦૨૦ની ઉજવણી કરવામાં આવી રહી છે. કોરોના મહામારીના કારણે સોશ્યલ મીડિયાનો ઉપયોગ કરી વર્ચુઅલ રીતે ઉજવણી કરવા માટે અંદાજીત ૨૦૦ જેટલી જોખમી ચિન્હો ધરાવતી સગર્ભા માતાઓ સાથે જિલ્લાના આરોગ્ય શાખાના મેડિકલ ઓફિસરઓ દ્રારા ટેલીફોનિક વાર્તાલાપ કરી રસીકરણ સાથે સ્તનપાન અને કાંગારૂ કેર દ્વારા શિશુની સંભાળ, આઈએફએ અને કેલ્સિયમ ની ગોળીનુ મહત્વ વગેરે બાબતો અંગે વાર્તાલાપ અને જરૂરી માર્ગદર્શન પૂરું પાડશે.